استحملى

هيما · 10-21-2007, 12:26 AM

استحمِلي
جايْ لِك مع الفجر اللي راجع مهما موج بحرِك عِلِي..
لا يهمّني.. بُعد السَفَر..
ولا حتى سُورِك والغَفَر..
ولا خندق اليأس اللي بإْيدِيكي اتحفَر..
هَانْدَهْ وأقول لِك: يا حبيبتي..
أسمع غُناكي وتنزلي..
استحمِلي..
فاضِل مَفِيش..
وعشان نعيش..
لازم يصبّرنا الأمل..
وماتسأليش إيه اللي ممكن يتعمل..
دا البدر عايش في السما بْيصبُر لحدّ ما يكتمَل..
الحلم قرَّب.. قرَّبي..
مدِّي إيديكي وْجرَّبي..
وماتِيْئَسِيشْ مِ الحبّ.. لمّا بيتولد ويعيش عفيف..
واطَّمِّني.. أنا مش ضعيف..
ومانيش جبان.. لكن بابان طيِّب قوي..
وباحبّ أكون أبسط من الناس كلها
لكنْ في نفسي باكون قَوي
لا الدنيا تكسر قلبي يوم.. ولا حدّ فيها يهزِّني..
طبع السنابل يا حبيبتي يشدِّني..
لو فاضية... ترفع راسها فوق..
لو فيها حَبّ... بتنحني!!
استحملي..
أنا وأنتِ ورده ف أحلى جنّة عبيرها واصل للسما..
لو يوم قسمتي الوردة... لازم كل نص هيترمي
دا أنا قلبي فوق كفِّك نما
زهَّر.. وكل زهوره قاعدالِك تغنِّي..
ازَّاي تعيشي فْ لحظة وأنتِ بعيدة عنِّي؟!
طبْ جرَّبي...
انسيني يوم.. وقولي لي بس ازَّاي هتنسي وهتعيشيه!
ازَّاي يعيش قلبك ثواني ماكونش فيه؟
ازَّاي تقومي الصبح مابْقَاشْ حلم عايش بتشوفيه؟
ازَّاي عينيكي تشوف بشر...
مايكونش وشِّي ف أيّ واحد تلمحه؟!
أنا ننّ عينك.. يبقى بسّ ازَّاي عيونك يجرحُوا؟!
ازَّاي تغنِّي وتلعبي.. وف قلبي عودك.. ملعبك؟!
ازَّاي تذاكري.. ماتنحتيش اسمي ف قلوب على مكتبِك؟!
ازَّاي هتمشي ماتحلميش
إنك تقابليني في أقرب منحنَى؟!
ازَّاي تنامي وتحلمي بفارس يجيلِك ع الحصان
وماكونش أنا؟!
وإن يوم قدرتِ على الفراق.. هتكمِّلي؟
استحمِلي..
دمعِك كتير..
حتى امّا أشوف ضحكك.. بتنزل دمعة تايهة بتعتذر..
دمعك طريقي للكسَل..
دانا لما أشوف دمعة ف عيونِك نسْج قلبي بيتنسل...
وبيتغسل...
من دمع عينِك... والخجَل!!
ضحكة عيونك... أبتدي بيها اللي جيّ...
بسمة شفايفك... قلبي يفضل بيها حيّ...
خليكِ جنبي.. نخلِّي كل الدنيا ضيّ...
واستحملي..
لكن.. يا نبْض النبْض فيَّ.. وحلم عمري وفرحتُه
لو يوم رماكِ اليأس في إيدين الملل...
ونده خلاص قلبِك عليكِ بْدون أمل...
هاتي الرسايل.. والهدايا.. والصوَر..
بصّي بخيالِك عَ اللي فات.. والذكريات..
افتِكْري ضحكة قلبنا ف يوم اللقا..
افتِكري دمعة قلبنا ف يوم الشقا..
افتِكري كل شريط حياتنا وحبِّنا..
وانسيه بقى!!
انسي حبيب ضيَّعْتِ قلبه بْدون سبَب..
كان كل ذنبه...
إنُّه قال لِك لمّا شاف قلبِك تِعِب:
"استحمِلي...
جاي لِك مع الفجر اللي راجع
... مهما موج بحرِك عِلِي"

التوقيع: هيما

الخيل والليل والبيداء تعرفنى وانا معرفهمش اصلا

جنات · 10-22-2007, 10:36 AM

هيما انا بجد سعيده جدا انى اول وحده اشارك فى الرد

وعايزه اقول انى استمتعت جدا بقرائة كلامك

بجد كلام جميل كله احساس ورقه وبساطه غير عاديه

كلام ينطلق نحو القلب بسرعه فائقه

بجد انا سعيده بيك جدا دودت ودامت كتاباتك ودام نبض قلبك

شيكو · 10-22-2007, 11:32 AM

شـكــ وبارك الله فيك ـــرا ...

تسلم هيما

كلمات رائعه

وفقك الله

ورود · 11-01-2007, 08:15 PM

قصيده جميله تخش القلب وذات احساس رائع
ورور
قلب وروح

DOOOOOOM · 11-02-2007, 02:13 PM

هيمااااااااااااااااااااااا

كلماتك جميلة وبسيطة

احساس دافئ جداا

تسلم حبيبي على الموضوع

منتظرين منك كل جديد بإزن الله

تقبل مرورى

صاصا صاصا · 11-02-2007, 10:51 PM

السلام عليكم
الأخ هيما
أرجو كتابة اسم الشاعر الحقيقى على القصيدة لان الجميع يظن انها من تأليفك وهى ليست كذلك فهى من تأليف الشاعر المصرى اشرف توفيق ومنشورة فى ديوانه المطبوع منذ أكثر من سنتين ومنشورة فى أكثر من موقع على النت.. كما أنها موجودة على مدونة الشاعر الخاصة التى يكتب فيها اشعاره وخواطره الساخرة والنقدية..
ارجو مرة أخرى كتابة اسم الشاعر الحقيقى الشاعر أشرف توفيق وأن تأخذ حذرك بعد ذلك إذا اخترت عملا أعجبك ان تكتب اسم صاحبه الحقيقى ..
ونرجو من المنتدى الكريم حذف اسم أى عضو يسرق أو يدعى ملكية اى قصيدة له..
ولكم جزيل الشكر
مدونة الشاعر المصرى أشرف توفيق
www.akhafdamm.blogspot.com

**مداوي** · 11-02-2007, 11:21 PM

السلام عليكم ورحمة الله وبركاته

هيما

عزيزي مجهودك رائع

وتشكر عليه

لكن ارجوو التقيد بقوانيين القسم

لابد من ذكر مصدر موضوعك

او كتابة عبارة منقول

وهذا مهم جداً..

اتمنى الجميع التقيد بالقوانين

صاصا

شكراً عزيزي على التنبيه

وحياك الله بين اخوانك

يغلق الموضوع

أدوات الموضوع
عرض نسخة صالحة للطباعة أرسل هذا الموضوع إلى صديق
خيارات عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)